skip to Main Content

Formuláriu Deklarasaun Alfândega

Bainhira ita-boot to’o-mai hanesan viajante ida tama mai Timor-Leste, ita-boot iha obrigasaun tuir lei atu prienxe formuláriu ida ba Deklarasaun Alfândega iha Xegada. Ita-boot bele asesu no foti-grava ka download kópia ida husi formuláriu ida-ne’e husi ne’e.

Fromuláriu ne’e inklui pergunta ualu ne’ebé ita-boot tenki lee ho kuidadu no hafoin fó ninia resposta. Iha eventu sira improvável bainhira formuláriu Deklarasaun Alfândega iha Xegada nian la disponível wainhira ita-boot to’o-mai iha Timor-Leste, entaun ita-boot sei halo deklarasaun verbál ida mai ami. Iha sikunstánsia sira hanesan ne’e, ami sei husu pergunta relevante sira ba ita-boot.

Kada viajante adultu bele lori sasán sira ne’ebé livre-taxa ho valór másimu to’o $300 (dolar atus tolu).

Ita-boot bele hatene liutan kona-ba ita-nia subsídiu sira ba livre-taxa nian iha ne’e.

Oinsá se hau-nia sasán sira-ne’e nia folin boot liu $300?

Se ita-boot lori sasán sira ne’ebé nia valór boot liu ita-nia subsídiu ba livre-taxa $300 nian, entaun ita-boot iha obrigasaun tuir lei atu informa mai ami. Naun-kumprimentu ba rekomendasaun ida-ne’e, bele rezulta iha multa ida ka até mezmu asaun judisiál ida hasoru ita-boot.

Se ita-boot nia sasán sira-ne’e ho valór kumulaivu lato’o $1,000, ita-boot bele simplesmente halo deklarasaun ida mai ami uza prosedimentu Deklarasaun Viajante nian (IT4). Se ita-nia sasán sira-ne’e ho valór kumulativu boot liu $1,000, entaun ita-boot tenki halo tuir prosedimentu Importasaun Komersiál (IM4). Ami bele tulun ita-boot hodi esplika ba ita-boot kona-ba prosedimentu diferente hirak ne’e depoizde ita-boot notifika mai ami kona-ba ita-nia sasán sira-ne’e no valór (sira) asosiadu.

Deklarasaun Viajante (IT4)

Ho ita-nia ajuda, ami sei prienxe formuláriu eletróniku simples ida, no ita-boot sei preiza fornese mai ami informasaun sira tuirmai ne’e:

  • Númeru Pasaporte
  • Naran
  • Enderesu ka hela-fatin
  • Fatura ka resibu ne’ebé ita-boot simu ba sasán sira-ne’e bainhira sosa
  • Nasaun ne’ebé ita sosa sasán ne’e
  • Moeda ne’ebé uza hodi sosa sasán ne’e
  • Númeru vou

Ita-boot presiza fó mai ami kópia ida husi kualkér fatura ka resibu pagamentu nian ne’ebé relevante atu konfirma kuantidade ka valór ne’ebé ita-boot selu ita-nia sasán sira. Ami uza figura ida-ne’e hodi kalkula ninia valór.

Bainhira kompleta ona, ami sei uza informasaun ne’ebé ita-boot fornese mai ami ne’e atu halo deklarasaun eletrónika ida iha sistema prosesamentu alfándega nian (koñesidu hanesan ASYCUDA World). Ami bele halo ida-ne’e imediatamente, no ita-boot la presiza uza servisu sira husi Despaxante Aduaneiru nian. Depoizde deklarasaun eletrónika ne’e halo prontu tiha, automatikamente sei kalkula direitu no impostu relevante sira, no ami sei fó komprovante pagamentu nian ida ba ita-boot.

Ita-boot bele hili atu selu ho kartaun débitu ka kréditu, ka ita-boot bele lori komprovante ida-ne’e ba ajénsia banku lokál ida hodi selu ho osan. Favór observa katak ami la simu pagamentu ho osan diretamente! Se ita-boot selu iha banku lokál ida , temporariamente ami sei tahan hela ita-nia sasán sira-ne’e to’o bainhira ita-boot fila fali mai hodi aprezenta komprovativu pagamentu husi banku. Ami bele fó instrusaun ba ajénsia banku lokál nian se ita-boot presiza ajuda.

Oinsá se hau-nia sasán sira-ne’e nia folin boot liu $1,000?

Se valór husi sasán sira ne’ebé ita-boot lori ne’e mak boot liu $1,000, entaun ita-boot tenki halo Deklarasaun ba Importasaun Komersiál (IM4). Ne’e sei envolve kontaktu ho Despaxante Aduaneiru ida, ne’ebé sei halo deklarasaun hodi ita-nia naran.

Lori Osan Tama Mai Timor-Leste

Se ita-boot hanoin atu lori tama ka lori sai osan ho valór $20,000 ka liu iha Dolar Amerikanu ka kuantia ekivalente iha kualkér moeda seluk, entaun ita-boot tenki hetan uluk lai autoizasaun husi Banku Sentrál Timor-Leste.

Iha xegada, ita-boot tenki deklara osan ida-ne’e mai ami no mós hatudu autorizasaun husi Banku Sentrál Timor-Leste nian. Ita-boot bele hatene informasaun liutan kona-ba instrusaun ofisiál Banku Sentrál nian iha ne’e.

Taxa no Enkargu sira

Úniku kustu sira ne’ebé ita-boot presiza selu mak ba direitu no impostu sira ne’ebé indikadu iha komprovativu pagamentu eletróniku nian. Se ema ruma husu ba ita-boot atu selu tipu pagamentu adisionál ruma, ita-boot tenki husu atu ko’alia imediatamente ho jerente ka supervizór ida. Alternativamente, ita-boot bele keixa informasaun ne’e ba Liña Apoiu Alfándega nian hodi liga ba 12200, ka prienxe formuláriu keixa online ida.

Falla atu deklara sasán sira relevante, ka osan ho kuantia totál $20,000 ba leten, bele signifika katak ita-boot komete daudaun infrasaun kriminál ida, no ita-boot bele sujeita ba pena multa, detensaun, ka prosesu iha tribunál. Se ita-boot laiha serteza, halo favór ko’alia ho ami no ami bele fó asisténsia liutan.

Feedback
Tell us more
How would you rate your experience?
Do you have any additional comment?
Next
Enter your email if you'd like us to contact you regarding with your feedback.
Back
Submit
Thank you for submitting your feedback!