skip to Main Content

Despaxante Aduaneira ida mak profisionál sektór privadu ida, ne’ebé hetan lisensa husi Autoridade Aduaneira Timor-Leste atu reprezenta importadór ka esportadór ida iha prosesu dezalfandegamentu ba sira-nia enviu. Haktuir ba Kódigu Aduaneira Timor-Leste nian, despaxante Aduaneira sira lisensiadu depoizde konklui tiha períodu ida ba formasaun téknika nian, pasa ho susesu iha ezame finál ida, no aprezenta depózitu garantia ida. Depózitu ida-ne’e bele varia husi US$ 10,000 to’o $40,000 ba ema individuál, no até US$150,000 ba empreza sira.

Funsaun prinsipál husi despaxante Aduaneira ne’e mak atu ajuda garante katak ita-nia enviu ne’e atende duni ba rekezitu sira hotu ba importasaun ka esportasaun nian tuir lei haruka. Ida-ne’e bele inklui garante katak dokumentu korreta aprezenta ona, no mós direitu, impostu no taxa relevante sira selu hotu ona. Atu halo ida-ne’e, ita-nia despaxante sei aprezenta eletronikamente ita-nia “Deklarasaun Merkadoria”, ne’ebé mós koñesidu nu’udar “Declaracao Aduaneira Unica” (DAU), atu uza iha ASYCUDA World. Ita-boot bele hatene liutan kona-ba ASYCUDA World, iha ne’e.

Bainhira mak atu uza despaxante Aduaneira ida

Normalmente, nesesáriu atu uza despaxante Aduaneira bainhira ita-boot rasik laiha koñesimentu no abilidade atu halo deklarasaun komersiál ida ho loloos mai ami. Atu halo ida-ne’e, ita-boot presiza atu kompriende didi’ak dokumentu ka autorizasaun saida de’it mak karik nesesáriu, no mós oinsá mak atu klasifika ita-nia merkadoria sira-ne’e uza kódigu Sistema Armonizadu (HS) nian. Fallansu atu aprezenta ita-nia deklarasaun korretamente bele rezulta iha impozisaun ba multa finanseira ida husi ami hasoru ita-boot.

Aleinde ne’e, ita-boot sei presiza asesu ba ASYCUDA World atu nune’e ita-boot bele halo rasik deklarasaun eletrónika ida. Hanesan mós ho Despaxante Aduaneira, karik sei ezije ba ita-boot atu aprezenta depózitu garantia mínimu ida ho valór $10,000.

Saida mak Despaxante Aduaneira ida nia funsaun?

Iha kraik ne’e mak lista ida husi tarefa komún sira ne’ebé empeña husi Despaxante Aduaneira sira:

  • Obtein informasaun, dokumentu no autorizasaun sira ne’ebé nesesáriu.
  • Klasifika ita-nia merkadoria sira-ne’e uza kódigu Sistema Armonizasaun (tarifa).
  • Prepara no aprezenta deklarasaun merkadoria eletrónika ida através ASYCUDA World.
  • Reprezenta ita-boot you, no atua hodi ita-boot nia naran, se karik ami ka ajénsia governu nian sira seluk presiza atu halo inspesaun ba ita-nia sasán sira.
  • Organiza ho entidade sira seluk, hanesan empreza estivadór sira, atu disponibiliza ita-nia sasán sira ba inspesaun (kuandu nesesáriu).
  • Selu obrigasaun, impostu no enkargu sira seluk hodi ita-boot nia naran.
  • Rekolla ita-nia merkadoria sira hodi ita-boot nia naran husi Portu ka fatin armazenamentu privadu no lori ba entrega iha fatin ne’ebé ita-boot rasik hili.

Dokumentu saida mak hau tenki aprezenta ba hau-nia despaxante?

Iha kraik ne’e mak lista ida kona-ba dokumentu sira ne’ebé normalmente ezije husi Despaxante Aduaneira ida:

  • Fatura komersiál (fatura ne’ebé entrega husi vendedór ba merkadoria sira iha momentu venda)
  • Lista embalajen
  • Bill of Lading ka Karta de Porte Aéreu (Airway Bill)
  • Kualkér autorizasaun ka lisensa nesesáriu (depende ba tipu merkadoria sira)

Molok entrega dokumentu hirak ne’e ba ita-nia despaxante Aduaneira, ita-boot tenki verifika loloos lai ninia ezatidaun. Ita-boot mak responsável ba aprezentasaun dokumentasaun ne’ebé verdadeira no ho presizaun, no inkumprimentu ba obrigasaun ida-ne’e bele rezulta iha ami sei impoin multa ida ka foti medida seluk hasoru ita-boot.

Diretóriu ba Despaxante Aduaneira

Ita-boot bele asesu no foti-grava ka download lista ida husi Despaxante Aduaneira lisensiadu ezistente, iha ne’e.

Detalle kontaktu
Prezidente Asosiasaun Despaxante Aduaneira
Hilario Correia Barros
(+670) 7725098
Vise Prezidente Asosiasaun Despaxante Aduaneira
Zeca Guterres
(+670) 77258920
Komentariu
Fo hatene tan mai ami
Oinsá mak ita bele klasifika ita-nia esperiénsia?
Karik ita iha komentariu adisional ruma?
Tuir mai
Submete ita nia email karik ita hakarak atu ami bele kontaktu ita relasiona ho ita nia komentariu
Fila fali
Submete
Obrigadu bele submete ona ita nia komentariu