skip to Main Content

Fundu

Janela Únika Nasionál mak portál aduaneiru ida iha-ne’ebé komersiante sira bele hatama dokumentu hotu-hotu relasinadu ho komérsiu nian no bele asesu informasaun relevante hotu-hotu kona-ba komérsiu nian através portal eletróniku ida úniku. Portal ne’e konekta Autoridade Aduaneira ho ajénsia governu nian hotu-hotu ne’ebé trata ho movimentasaun ema ka merkadoria sira, inklui autoridade tributária, imigrasaun, kuarentena, saúde, transporte, agrikultura, peska, negósiu estranjeiru, no Banku Sentrál.

Iha tinan 2017, governu liuhusi Konsellu Ministru aprova rezolusaun Nú. 24/2017 hodi estabelese NSW liuhusi sistema ASYCUDA World ne’ebé utiliza ona husi Autoridade Aduaneira iha tutela Ministériu Finance nian dezde 2018. Ita-boot bele asesu ba kópia ida husi rezolusaun ida-ne’e, iha ne’e.

Oinsá mak Janéla Únika Nasionál ne’e Ajuda Komersiante sira?

Tradisionalmente, bainhira komersiante sira hakarak atu halo importasaun ka esportasaun ba merkadoria, sira tenki hatama informasaun ne’ebé hanesan dala lubuk ba entidade governu oioin. Dalaruma dokumentu hirak ne’e tenki hatama eletronikamente, dalaruma iha suratahan de’it.

Ida-ne’e gasta tempu, dala barak folin karu, haboot xanse atu komete erru, no difikulta prosesu komérsiu nian. Sistema ida-ne’e automatiza no simplifika situasaun ida-ne’e hodi permite komersiante sira atu hatama informasaun hotu-hotu kona-ba importasaun, esportasaun no tránzitu nian ne’ebé ezije husi ajénsia reguladora sira através portál eletróniku ida úniku. Suratahan sira eliminadu no informasaun sira ne’ebé ho presizaun no konsistente disponível ba komersiante sira.

Hodi halo nune’e, sistema ne’e mós permite komersiante sira atu asesus regra, regulamentu, prosedimentu, tabela taxa no formuláriu komérsiu nian hotu-hotu ne’ebé relevante husi ajénsia jestaun fronteira nian hotu-hotu através website úniku ida ne’ebé fasil atu uza.

Janéla Únika Nasionál Lansa iha Timor-Leste

Iha loron 1 Fevereiru 2021, Mnistru Finansa, S.E. Rui Augusto Gomes no Ministru Koordenadór ba Asuntu Ekonómiku, S.E. Joaquim Amaral, ohin dadeer, ofisialmente lansa Janela Únika Nasionál husi Sistema ASYCUDA World hodi halo integrasaun TradeInvest ba iha plataforma online.

Lansamentu ne’e nu’udar marku importante ida ba Autoridade Aduaneira iha tutela Ministériu finansa nian iha kontestu programa reforma fiskál no finansa públika, ne’ebé inisialmente hahú tiha ona husi VI Governu no VIII Governu ida-ne’e komprmetidu tebes atu promove ajenda reforma refere. portál NSW ida-ne’e sei konekta Timor-Leste ba merkadu komérsiu globál nian no sei impulsiona nasaun ne’e asesu emprezariál ba merkadu sira iha área sira agrikultura, turizmu, peska, pekuária no indústria sira seluk – meiu ida atu fasilita Timor-Leste hodi diversifika ninia ekonomia.

Portál online ne’e sei konekta Autoridade Aduaneira ne’ebé iha tutela Ministériu Finansa ho liña ministeriál / ajénsia governu nian sira ne’ebé trata ho movimentasaun ba merkadoria no servisu sira, inklui Autoridade Tributária, Imigrasaun, Kuarentena, Ministériu Saúde, Ministériu Transporte no Telekomunikasaun, MTKI, TradeInvest no Autoridade Portuáriu. Sistema interface ne’ebé empregadu iha servisu sira administrasaun públika nia laran ne’e sei diminui konjestaun, hamenus kustu ba transasaun, inklui tempu ba dezalfandegamentu iha fronteira terrestre, portu, no aeroportu sira – halo sai fasil ba komersiante sira. Ida-ne’e mós sei ajuda Governu liuhusi Ministériu Finansa atu halo kobransa ba reseita ho maneira ida justu no transparente.

Lansamentu ho susesu ba NSW ne’e nu’udar parte husi esforsu ida husi Autoridade Aduaneira ne’ebé iha tutela Ministériu Finansa iha supervizaun S.E. Vise-Ministra Dra. Sara L. Brites, ho apoiu no asisténsia husi Konferénsia Nasoens Unidas ba Asuntu Komérsiu no Dezenvolvimentu [United Nations Conference on Trade and Development] (UNCTAD).

Feedback
Tell us more
How would you rate your experience?
Do you have any additional comment?
Next
Enter your email if you'd like us to contact you regarding with your feedback.
Back
Submit
Thank you for submitting your feedback!