Saida mak Fatura Komersiál ida?
Fatura Komersiál mak dokumentu legál ida entre fornesedór (konsignadór) no kliente (konsignatóriu). Dokumentu ida-ne’e tenki inklui detalle sira ba pagamentu nian, instrusaun, no kondisaun sira.
Saida mak diferensa entre Lista Embalajen no Fatura Komersiál?
Embora informasaun sira ne’ebé kontein iha Lista Embalajen no Fatura Komersiál nia laran ne’e bele haree ba hanesan de’it, maibé dokumentu rua ne’e serbí ba finalidade ne’ebé diferente tebetebes. Lista Embalajen nian fornese ba esportadór, despaxante frete internasionál, no konsignatáriu finál informasaun sira kona-ba enviu ka remesa. Lista ida-ne’e mós inklui detalle sira kona-ba oinsá mak halo embalajen ba enviu ne’e no mós marka no númeru sira ne’ebé anotadu iha parte li’ur husi kaixa sira-ne’e.
Dokumentu ida-ne’e serbí liu ba finalidade lojístika nian no nesesáriu duni se bainhira mosu disputa ka reklamasaun ruma ho kompañia marítima nian, alfándega, ka entre sosa-na’in no vendedór ba merkadoria sira-ne’e. Ida-ne’e mós uza atu verifika katak merkadoria hotu-hotu ne’ebé enviada husi esportadór ne’e simu ho orden no kondisaun sira ne’ebé di’ak, no mós ba finalidade sira manutensaun estoke no inventóriu nian.
Tansá mak Fatura Komersiál ne’e Nesesáriu?
Fatura Komersiál nu’udar dokumentu ida importante tebetebes entre sira seluk iha kontestu komérsiu internasionál, no informasaun ne’ebé kontein iha dokumentu ida-ne’e nia laran ne’e uza hodi kria fali deklarasaun aduaneira. Alfándega verifika validade husi fatura ne’e hodi garante katak nia sei kumpri duni ba lei sira iha nasaun esportadór nian. Nasaun sira hanesan Austrália, Xina, Indonézia, no Malázia, sei sempre inklui informasaun mínimu tuirmai ne’e iha impostu reál ka fatura komersiál ida nia laran:
- Dokumentu ne’e entendidu atu sai nu’udar fatura fiskál ida.
- Vendedór nia identidade.
- Sosa-na’in nia identidade.
- Vendedór nia númeru úniku negósiu nian (porezemplu iha Austrália mak ABN).
- Data ne’ebé fatura ne’e fó-sai.
- Deskrisaun breve ida kona-ba iten sira ne’ebé fa’an, inklui kuantidade (karik aplikável) no presu.
- Referénsia ba GST ka kuantidade IVA [VAT] (karik iha), ka identifikasaun husi 0% ba esportasaun.
- Incoterm.
Informasaun saida de’it mak tenki inkluidu?
Maski laiha formatu padraun ruma, maibé fatura komersiál ne’e tenki inklui informasaun espesífika balun, hanesan parte sira ne’ebé envolvidu iha transasaun enviu ne’e, merkadoria sira ne’ebé transportada, nasaun fabrikasaun nian, no kódigu Sistema Armonizadu nian ba merkadoria hirak ne’e. Fatura komersiál ida tenki inklui mós deklarasaun ida ne’ebé sertifika verasidade husi fatura ne’e, no asinatura ida.
Ita-boot bele hatene liutan informasaun kona-ba fatura sira liuhusi foti-grava ka download ami-nia livretu informasaun, iha ne’e.
